Кшыштаф Занусі: паводзіны кіраўніцтва ГрДУ непрымальныя
PR dla Zagranicy
Dzmitry Hurnievic
06.04.2013 20:31
Сусьветнавядоды польскі рэжысёр зьяўляецца ганаровым прафэсарам Гарадзенскага ўнівэрсытэта.
Ганаровы прафэсар Гарадзенскага дзяржаўнага ўнівэрсытэта імя Янкі Купалы, сусьветнавядомы польскі рэжысёр Кшыштаф Занусі лічыць недапушчальным перасьлед акадэмічнай супольнасьці ў Гародні.
На просьбу Польскага радыё пракамэнтаваць звальненьні дацэнта Андрэя Чарнякевіча, прафэсара Вячаслава Шведа, а таксама выкладчыка Ігара Кузьмініча, Кшыштаф Занусі сказаў:
“Сыстэма ў Беларусі – гэта выключэньне, іншай такой краіны ў Эўропе няма. Гэтыя рашэньні недапушчальныя. Гэта ніяк ня ўпісваецца ў эўрапейскія стандарты”.
А ці гатовыя Вы падключыцца да акцыі салідарнасьці са звольненымі выкладчыкамі?
Кшыштаф Занусі: Я ня бачу сэнсу пісаць лісты й рабіць нейкія крокі. З уласнага досьведу жыцьця ў падобнай сыстэме я ведаю, што такія жэсты значаць няшмат. Калі ўзьнікне такая неабходнасьць, то я абавязкова прадпрыму пэўныя крокі. Але сёньня я ня бачу ў іх сэнсу. На практыцы яны нічога ня зьменяць. Гэта справа беларусаў, яны павінны выказвацца на гэты конт, бо кожны павінен сам змагацца за свабоду. Няхай спачатку яны адкажуць на пытаньне: які выбар яны зрабілі, як народ.
Нагадаем, нагодай для звальненьня гісторыкаў Андрэя Чарнякевіча й Вячаслава Шведа стала іх праца над кнігай на гісторыі Гародні “Гродназнаўства”. Мясцовыя ўладчы палічылі кнігу крамольнай. Пазьней старшыня Гродзенскага аблвыканкама Сямён Шапіра публічна прызнаўся, што асабіста аддаў загад звольніць з Гарадзенскага ўнівэрсытэта дацэнта Андрэя Чарнякевіча.
Дзьмітры Гурневіч
tags: