Прыняцьце дэкамунізацыйнага пакета законаў, у якім, сярод іншага, АУН і УПА прызнаюцца фармацыямі, якія змагаліся за незалежнасьць Украіны, занепакоіла Польшчу. Варшава разьлічвае, што Ўкраіна ўнясе зьмены ў дадзены закон, каб гэта не перашкаджала ажыцьцяўленьню гістарычнага дыялёгу паміж краінамі.
Пра гэта ў Варшаве падчас VIII пасяджэньня Міжпарляменцкай асамблеі Ўкраіны і Польшчы заявіла віцэ-старшыня Сэйму Альжбета Радзішэўская.
«Прыняцьцё ў дзень афіцыйнага візыту прэзыдэнта Браніслава Камароўскага так званых гістарычных законаў выклікала ў Польшчы ня толькі зьдзіўленьне, але і занепакоенасьць. Мы не разумеем ня толькі час, але і зьмест некаторых законаў. Яны выклікаюць сумневы і спрэчкі », - сказала Альжбета Радзішэўская.
Яна адзначыла, што гаворка ідзе пра асобныя палажэньні, у якіх АУН і УПА прызнаюцца фармацыямі, якія змагаліся за незалежнасьць Украіны.
«Баімся, што прыняты закон пэўным чынам можа прыпыніць працу форуму, які створаны для дыскусіі над агульнай гісторыяй і які дзейнічае пад патранатам кіраўнікоў МЗС дзьвюх краін - Польска-ўкраінскага форуму партнэрства, асабліва ў кантэксьце вядзеньня дыскусіі адносна адказнасьці АУН і УПА за Валынскае злачынства », - адзначыла віцэ-старшыня Сэйму.
Альжбета Радзішэўская падкрэсьліла, што адмена супярэчлівых палажэньняў закона, якія тычацца АУН і УПА, была б «лепшым спосабам вырашэньня праблемы».
Нагадаем, што 9 красавіка Вярхоўная Рада Ўкраіны прыняла закон аб прызнаньні такіх арганізацый, як Карпацкая січ, УПА, АУН, Сойм Карпацкай Украіны, Украінскі Хельсінскі саюз і т .п., арганізацыямі, якія змагаліся за незалежнасьць Украіны.
Дзяржава, згодна з законам, можа вызначыць змагарам за незалежнасьць сацгарантыі, льготы і дзяржузнагароды.
яс