Названыя сярэднія зарплаты ў Эўразьвязе

Статыстычнае бюро Эўразьвязу «Эўрастат» апублікавала апошнія зьвесткі аб памерах мінімальных заробкаў за месяц у краінах ЭЗ. На 1 студзеня 2017 года мінімальная месячная зарплата была ўстаноўленая ў 22 краінах ЭЗ.

Самая высокая мінімалка ў Люксэмбургу (1999 эўра), Ірляндыі (1563 эўра), Нідэрляндах (1552 эўра), Бэльгіі (1532 эўра) і Германіі (1498 эўра).

Мінімальная зарплата не перавышае 500 эўра ў месяц у Чэхіі (407 эўра), Вугоршчыне (412 эўра), Харватыі (433 эўра), Славакіі (435 эўра), Польшчы (453 эўра) і Эстоніі (470 эўра). У Латвіі і Летуве мінімальны заробак цяпер складае 380 эўра ў месяц. Меншы ён толькі ў Балгарыі (235 эўра) і Румыніі (275 эўра).

Самая высокая мінімальная месячная зарплата ў ЭЗ у дзевяць разоў перавышае самую нізкую, а калі выключыць адрозьненьні ва ўзроўні коштаў у розных краінах, гэтыя суадносіны складаюць 1:3.

У параўнаньні з 2008 годам мінімальная зарплата больш за ўсё вырасла ў Балгарыі (+109%), Румыніі (+99%), Славакіі (+80%). У Эстоніі прырост склаў 69%, у Латвіі – 65%, у Летуве – 64%. Адзіная краіна, дзе мінімальны заробак за гэты пэрыяд зьнізіўся, – Грэцыя (-14%).

Мінімальная зарплата перавышае 60% ад сярэдніх даходаў толькі ў трох краінах ЭЗ: Партугаліі (64%), Францыі й Славеніі (па 62%). У Латвіі й Летуве гэты паказчык складае 52%, у Эстоніі – 40%.

У Аўстрыі, Даніі, Італіі, Фінляндыі, Швэцыі й на Кіпры дзяржава не ўстанаўлівае мінімальную зарплату.

корреспондент/вс