Турцыя прыпыніла дыпляматычныя адносіны зь Нідэрляндамі

Турцыя вымушана прыпыніць дыпляматычныя адносіны зь Нідэрляндамі на фоне дыпляматычнага канфлікту, паведаміў турэцкі віцэ-прэмʼер Нумана Куртулмуша. Ён таксама заявіў аб магчымасьці перагляду пагадненьня з Эўразьвязам аб міграцыі.

У сваю чаргу ўлады Нідэрляндаў заклікалі сваіх падданых, якія знаходзяцца ў Турцыі, праяўляць асьцярожнасьць у сувязі з ускладненьнем адносін паміж дзьвюма краінамі.

Раней Турцыя накіравала Нідэрляндам дзьве ноты пратэсту ў сувязі з абмежаваньнямі ў дачыненьні да турэцкіх міністраў, а таксама непрапарцыйным ужываньнем сілы ў дачыненьні да прадстаўнікоў турэцкай дыяспары.

Як паведамлялася, канфлікт паміж Турцыяй і Нідэрляндамі ўзьнік у сувязі з забаронай удзелу прадстаўнікоў Анкары ў мітынгах у Ратэрдаме ў рамках кампаніі перад турэцкім канстытуцыйным рэфэрэндумам.

Двое турэцкіх міністраў павінны былі ў суботу прыняць удзел у сустрэчы перад красавіцкім рэфэрэндумам з туркамі, якія жывуць у Галяндыі. Падчас рэфэрэндуму будзе вырашацца зьмена дзяржаўнай сыстэмы з парлямэнцка-міністэрскай на прэзыдэнцкую.

Галяндзкія ўлады, спасылаючыся на пытаньні грамадзкага парадку й бясьпекі, не далі згоды на прызямленьне самалёту з турэцкім кіраўніком дыпляматыі. У сваю чаргу міністар па справах сям’і й сацыяльнай палітыкі не была ўпушчаная ў турэцкае консульства. У суправаджэньні галяндзкай паліцыі яе выслалі на нямецкую мяжу.

Эўразьвяз, Нямеччына й некаторыя іншыя эўрапейскія краіны ў канфлікце сталі на бок Нідэрляндаў.

вс