Паліцыя затрымала мужчыну, які плянаваў забіць прэзыдэнта Эманьюэля Макрона

Француская паліцыя затрымала мужчыну, які, паводле праваахоўнікаў, плянаваў забіць прэзыдэнта Эманьюэля Макрона. Малады мужчына, якому 23 гады, называе сябе нацыяналістам.

Праваахоўныя органы трапілі на сьлед падазраванага ў інтэрнэце. На адным з парталаў ён напісаў абʼяву, што хоча купіць аўтамат Калашнікава. Калі паліцыянты прыбылі ў яго кватэру, каб яго арыштаваць, малады чалавек накінуўся на іх з нажом.

Згода паведамленьням паліцыі, 23-гадовы мужчына плянаваў забіць Макрона падчас параду з нагоды нацыянальнага сьвята, які заплянаваны на 14 ліпеня. Малады чалавек зьяўляецца прыхільнікам крайне правых сіл, ён таксама распаўсюджваў у інтэрнэце й сярод знаёмых расісцкія й ксэнафобскія меркаваньні. Раней ён быў прыгавораны судом за пазытыўныя выказваньні наконт тэрарызму.

вс