Археолягі знайшлі парэшткі Кастуся Каліноўскага
PR dla Zagranicy
Alaksandar Papko
01.09.2017 17:05
«Маецца дастаткова доказаў таго, што сярод выяўленых астанкаў ёсьць парэшткі Канстанціна Каліноўскага», – заяўляюць навукоўцы зь Летувы.
Кастусь Каліноўскі,1863 годPublic Domain
Пры раскопках на гары Гедыміна ў Вільні, археолягі, верагодна, знайшлі парэшткі абодвух найбольш значных лідараў паўстаньня 1863 году супраць Расейскай Імпэрыі – Кастуся Каліноўскага й Зыгмунта Серакоўскага. Пра гэта паведамляе партал Delfi.
«Маецца дастаткова доказаў таго, што сярод выяўленых астанкаў ёсьць парэшткі Канстанціна Каліноўскага», – сказаў інфармагенцтву Baltic News Service прафэсар катэдры анатоміі Віленскага ўнівэрсытэту Рымантас Янкаўскас. Паводле яго словаў, гэтя гіпотэза не супярэчыць сабраным археалягічным і антрапалягічным дадзеным.
Рымантас Янкаўскас адзначыў, што для канчатковага пацьверджаньня здагадкі неабходна завяршыць дасьледаваньне ўсіх парэшткаў, знойдзеных на гары Гедыміна.
«Іншымі словамі, калі мы ня выявім іншага, больш цьвёрдага кандыдата, з якім бы супала больш доказаў, то будзем сьцьвярджаць, што гэта астанкі Канстанціна Каліноўскага», – сказаў прафэсар.
Наконт ідэнтыфікацыі парэшткаў Зыгмунта Серакоўскага ўжо няма сумневаў, паколькі быў знойдзены заручальны пярсьцёнак з ініцыяламі камандзіра паўстанцаў й яго жонкі.
Кастусь Каліноўскі зьяўляецца адным з нацыянальных герояў Беларусі. Юрыст, беларускі публіцыст і паэт, ён быў адным з лідараў паўстаньня 1863 года на землях Летувы й Беларусі. 9 лютага 1864 года Каліноўскі быў арыштаваны, а 22 сакавіка павешаны ў Вільні.
Доўгі час месцазнаходжаньне яго магілы заставалася невядомым. Неаднаразова выказваліся здагадкі, што яго цела было пахаванае на гары Гедыміна, дзе ў сярэдзіне XIX стагодзьдзя разьмяшчалася расейская вайсковая частка.
delfi.lt/ап