У Варшаве прайшла першая беларускамоўная інтэлектуальная гульня

Больш за 50 чалавек сабрала першая беларускамоўная паб-віктарына Jakub Quiz, якая прайшла ў сталіцы Польшчы. Гульня была прысьвечана 135-годзьдзю з дня нараджэньня клясыка беларускай літаратуры паэта Якуба Коласа.

10 камандаў спрабавалі адказаць на не самыя простыя пытаньні, якія датычылі беларускай літаратуры, гісторыі, сучаснай музыкі й беларускіх жартаў. Каб перамагчы, трэба было ведаць ня толькі біяграфію Якуба Коласа, але й вершы Андрэя Хадановіча, пэрсанажаў перадачы «Калыханка», аўтараў тэкстаў песень гурту BRUTTO, асаблівасьці сьвяткаваньня Дня дэсантніка й нават жыцьцёвы шлях Аляксандра Саладухі.

Арганізавалі віктарыну студэнты Аляксандар Лапко ды Алеся Пажытак. Гульні на беларускай мове будуць праводзіцца ў Варшаве й далей – кажа Аляксандар Лапко.

Аляксандар Лапко: Мы хочам праводзіць гульні на больш-менш рэгулярнай аснове. Кожны месяц у нас не атрымаецца, але мы будзем старацца прымеркаваць гульні да важных падзеяў і юбілеяў. Напрыклад, у сакавіку мы плянуем арганізаваць гульню, прысьвечаную стагодзьдзю абвяшчэньня Беларускай Народнай Рэспублікі.

Першае месца ў віктарыне Jakub Quiz заняла каманда «Толькі не гавары маёй маме».

Удзельнікі беларускай інтэлектуальнай гульні ў Варшаве сабралі суму ў 800 злотых (400 беларускіх рублёў). Грошы пойдуць на ўстаноўку помніка Тадэвушу Касьцюшку на яго радзіме – у маёнтку Мерачоўшчына на Берасьцейшчыне.

Аляксандар Папко, Варшава