Футбаліст «Баварыі Мюнхэн» купіў у Варшаве даражэзны апартамэнт (ФОТА)

Адзін з найлепшых польскіх футбалістаў, капітан зборнай Польшчы па футболе, які гуляе за нямецкі клюб «Баварыя Мюнхэн», Робэрт Левандоўскі купіў у Варшаве дарагі й люксавы апартамэнт. Пра гэта паведаміла кампанія, якая прадае апартамэнты па вуліцы Злотай 44 (Złota 44) у польскай сталіцы.

Робэрт Левандоўскі ў суправаджэньні прадстаўніка кампаніі паказаў апартамэнт журналістам.

Варшаўскі будынак, які атрымаў назву Złota 44, разьмешчаны ў самым сэрцы польскай сталіцы й зьяўляецца найвышэйшым жылым аб'ектам у Эўразьвязе. Яго вышыня складае 192 мэтры, у ім выключна люксавыя апартамэнты рознай плошчы. Цэны жыльля за квадратны мэтар вагаюцца ад 6 тыс. эўра да 15 тыс. эўра. Пры гэтым апартамэнты ў небаскробе былі раскупленыя вельмі хутка. Сярэдняя плошча кватэры ў будынку – 120 квадратных мэтраў, але ёсьць і апартамэнты па некалькі сот мэтраў.

Якая плошча кватэры Робэрта Левандоўскага й колькі ён за яе заплаціў – не паведамляецца.

Аўтарам праекту будынку Złota 44 зьяўляецца нараджэнец польскай Лодзі, амэрыканскі архітэктар-дэкаструктывіст і зорка сусьветнай архітэктуры Даніэль Лібэскінд.

вс

Робэрт Левандоўскі ў вакне свайго апартамэнту/фота: Złota 44

Робэрт Левандоўскі падпісвае дакумэнты аб набыцьці кватэры/фота: Złota 44