Logo Polskiego Radia
Print

СМІ: ФСБ цягам некалькіх месяцаў вяла опэрраспрацоўку польскай спэцслужбы

PR dla Zagranicy
Valery Sauko 23.11.2017 15:15
ФСБ вяла апэратыўную распрацоўку ў дачыненьні да супрацоўнікаў польскага Агенцтва ўнутранай бясьпекі на тэрыторыі Польшчы.
pixabay.com/Public Domain CC0

ФСБ на працягу некалькіх месяцаў вяла апэратыўную распрацоўку ў дачыненьні да супрацоўнікаў Агенцтва ўнутранай бясьпекі (АУБ) Польшчы. Расейскія спэцслужбы легальна прыбылі ў краіну па запрашэньні польскай контрразьведкі. Нагодай паслужыла барацьба з злачыннымі групамі. Пра гэта паведамляюць нашы калегі з Расейскай службы Польскага радыё са спасылкай на дзяржаўны інфармацыйны тэлеканал TVP Info.

Афіцыйна службы расьсьледавалі дзейнасьць злачыннай групы, якая дзейнічала ў Польшчы й Калінінградзкай вобласьці. «Пад выглядам супрацоўніцтва ФСБ раскрывала польскіх афіцэраў контрразьведкі, высьвятляла, як працуюць аддзелы Агенцтва па барацьбе з пагрозай з боку Расеі, і празь некалькі месяцаў пакінула Польшчу безь якіх-небудзь перашкод», – інфармуе TVP Info.

Паведамляецца, што новы кіраўнік контрразьведкі Пётр Паганоўскі ў чэрвені 2016 года даў даручэньне дырэктару Дэпартамэнту бясьпекі й аўдыту высьветліць гэтае пытаньне.

Паводле дадзеных TVP Info, рашэньне аб супрацоўніцтве паміж АУБ і ФСБ было прынятае пасьля сустрэчы прадстаўнікоў дзьвюх службаў, якая адбылася ў Калінінградзкай вобласьці 29-31 мая 2012 году. Пасьля гэтага штаб-кватэра польскай контрразьведкі накіравала распараджэньне ў Ольштынскае ўпраўленьне наладзіць супрацоўніцтва з ФСБ.

«Па просьбе расейцаў, афіцэры контрразьведкі з Ольштына пачалі апэратыўныя дзеяньні ў дачыненьні да згаданых асобаў. Як запэўнівала ФСБ, яны належалі да злачыннай групы, якая дзейнічала ў Калінінградзкай вобласьці й Польшчы. Аднак, крыніца сьцьвярджае, што супрацоўніцтва службаў было фіктыўным, і злачынная група не існавала», – гаворыцца ў матэрыяле TVP Info.

Акрамя таго, з дакумэнтаў вынікае, што расейцы пад выглядам супрацоўніцтва вывучалі дзейнасьць АУБ, галоўным чынам упраўленьня ў Ольштыне, мэтай якога зьяўляецца менавіта дзейнасьць расейскіх спэцслужбаў. Паводле дадзеных выданьня, аднаму з супрацоўнікаў ФСБ, які павінен быў быць кансультантам, было дазволена праводзіць апэратыўную дзейнасьць у Польшчы.

вс

Print
Copyright © Polskie Radio S.A Пра нас Кантакт