Хітамі выставы ў Варшаве сталі багата ілюстраваныя беларускія выданьні
PR dla Zagranicy
Alaksandar Papko
02.12.2017 14:00
-
Хітамі выставы ў Варшаве сталі багата ілюстраваныя беларускія выданьні.mp3
У першыя 2 дні працы Кірмашу гістарычнай літаратуры былі раскупленыя ўсе экзэмпляры кніг «Радзівілы» й «Ліцьвіны ў гвардыі Напалеона».
ragna.by
Больш за 220 выдавецтваў прынялі ўдзел у XXVI Кірмашы гістарычнай літаратуры, які праходзіць у Варшаве. Сярод удзельнікаў міжнароднай выставы – 6 выдаўнічых дамоў зь Беларусі. Свае кнігі ў польскай сталіцы прадставілі выдавецтвы «Беларускі кнігазбор», «Тэхналёгія», ARCHE, «Янушкевіч», «Галіяфы» і «Лімарыюс».
Асаблівым попытам на кніжнай выставе ў Варшаве карысталіся новыя багата ілюстраваныя беларускія выданьні - напрыклад, мастацкі альбом «Радзівілы» – расказвае дырэктар выдавецтва «Галіяфы» Зьміцер Вішнёў.
Зьміцер Вішнёў: Мы прывезьлі некалькі важных выданьняў. Гэта ваенныя мэмуары Вікенція Мароза «Перажытае – не забытае»; мастацкі каталёг «Радзівілы», які ўжо скончыўся – мы не разьлічылі колькасьць, якую трэба было ўзяць на выставу. Таксама мы прывезьлі кнігу Міхаіла Галдзянкова «Забытая Першая сусьветная вайна», кнігу Мікалая Плавінскага «Ўзбраеньне беларускіх земляў Х-ХІІІ стагодзьдзяў», а таксама кнігу Ігара Мельнікава «Заходнебеларуская Атлянтыда».
Іншым хітом выставы стала кніга Ўладзімера Лякіна «Ліцьвіны ў гвардыі Напалеона». Кніга прываблівае ня толькі тэмай, якая мала вядомая шырокай публіцы, але і надзвычай багатым афармленьнем – кажа прадстаўніца выдавецтва «Тэхналёгія» Ксенія Тарасевіч.
Ксенія Тарасевіч: Над гэтай кнігай мы працавалі вельмі доўга, але высілкі былі вартыя. Кніга атрымалася вельмі густоўнай. Яна каштоўная ня толькі сваім зьместам ці ілюстрацыямі, але й тым, што ў канцы апублікаваныя імёны ўраджэнцаў Беларусі, якія ўдзельнічалі ў значных бітвах напалеонаўскіх паходаў. Гэта кніга будзе цікавая тым, хто шукае свае карані.
Кірмаш гістарычнай літаратуры зьяўляецца адной з самых вялікіх кніжных выставаў Польшчы. У гэтым годзе ён праходзіць з 30 лістапада па 3 студзеня.
ап