Пантонны мост у Жыткавічах зьнесла лёдам
PR dla Zagranicy
Alaksandar Papko
14.01.2018 10:39
Вайскоўцы абяцаюць аднавіць пераправу цягам дня.
Аварыйны мост і пантонная пераправа праз Прыпяць. Фота: Міністэрства па надзвычайных сыуацыях Беларусі. 112.by
Пантонная пераправа ў Жыткавічах, пастаўленая вайскоўцамі, каб замяніць аварыйны мост праз Прыпяць, была зьнесеная лёдам – паведамляе афіцыйнае інфармацыйнае агенцтва БЕЛТА. Прадстаўнікі Міністэрства абароны заяўляюць, што пераправа будзе адноўленая на працягу дня.
Як паведаміў журналістам прэс-сакратар Мінабароны Ўладзімер Макараў, з-за рэзкага пахаладаньня па Прыпяці пачалі ісьці крыгі, якія сарвалі тросы, што трымалі пантонны мост. Да таго, як вайскоўцы адновяць канструкцыю, перавозіць людзей з аднаго берага на іншы будуць катэры Міністэрства па надзвычайных сытуацыях. Аўтамабілі пускаюць у аб’езд.
Пантонны мост даўжынёй 146 мэтраў быў наведзены Міністэрствам абароны й ратавальнікамі 10 сьнежня, каб часова замяніць стацыянарны аўтамабільны мост праз Прыпяць. За тры дні да гэтага ў адным з пралётаў моста ўтварылася расколіна, якая прывяла да прасяданьня канструкцыі.
belta.by/ап