Летувіскія навукоўцы шукаюць сваякоў Кастуся Каліноўскага

Летувіскія навукоўцы, якія дасьледуюць выяўленыя на віленскай Замкавай гары парэшткі паўстанцаў 1863 году, пры дапамозе генэтычнага аналізу стараюцца ўстанавіць, якія зь іх – парэшткі Кастуся Каліноўскага. Цяпер вядзецца пошук генэтычнага матэрыялу ад сваякоў Каліноўскага з мэтай параўнаньня генатыпу, расказаў прафэсар Рымантас Янкаўскас. Пра гэта паведамляе Польскае агенцтва друку.

Прафэсар сказаў, што ў Беларусі пахаваны брат Кастуся, але, паводле Янкаўскаса, афіцыйны Менск «хутчэй за ўсё ня дасьць дазволу на эксгумацыю», таму навукоўцам прыходзіцца шукаць іншых сваякоў паўстанцкага правадыра.

У 2017 годзе на Замкавай гары, якую таксама называюць гарой Гедыміна, былі выяўленыя парэшткі паўстанцаў 1863 году. Сярод іншага, па фамільнаму пярсьцёнку ўдалося ўстанавіць, што на гары пахаваны Зыгмунт Серакоўскі – адзін зь лідараў збройнага чыну.

У 1863-1864 гадах на гары Гедыміна царскія ўлады ў таямніцы пахавалі пакаранага сьмерцю 21 паўстанца. У мінулым годзе былі выяўленыя парэшткі 17 чалавек. Сёлета працы на гары працягнуцца – іх пачатак заплянаваны на першую палову чэрвеня.

Перапахаваньне паўстанцаў адбудзецца хутчэй за ўсё ў 2019 годзе.

вс