Агенцтва ўнутранай бясьпекі Польшчы 17 траўня затрымала грамадзянку Расеі Кацярыну Цывільскую, якая дапамагала арганізоўваць антыўкраінскія акцыі за расейскія грошы расейскага алігарха. Падрабязнасьці паведамляе партал
Polukr.net.
Як высьветлілася, Цывільская — знаёмая грамадзяніна Беларусі Аляксандра Усоўскага, які яшчэ ў 2014 годзе каардынаваў антыўкраінскія акцыі ў Польшчы, а таксама ў суседніх Славакіі і Вугоршчыне.
Паводле прэс-сакратара Агенцтва ўнутранай бясьпекі Польшчы, Цывільская рабіла “спробы кансалідацыі прарасейскіх асяродкаў у Рэспубліцы Польшча вакол двух прыярытэтных для расейскага боку пытаньняў: падбухторваньня польска-ўкраінскай варожасьці, а таксама аспрэчваньня польскай гістарычнай палітыкі і замены яе на расейскія погляды”.
Паводле профілю Цывільскай на партале Goldenline.pl, затрыманая грамадзянка Расеі ў кастрычніку 2013 году пачала вучыцца ў дактарантуры Ягелёнскага ўнівэрсытэту ў Кракаве. Але ці скончыла навучаньне, зьвестак няма. Са зьмешчанай у інтэрнэце інфармацыі вядома, што яна займалася перакладамі з польскай мовы на расейскую і наадварот. Стала жыла ў Кракаве, шукала працу ў рэкляме, маркетынгу, на курсах расейскай мовы, а таксама „ахвотна магла дапамагчы ў арганізацыі польска-расейскіх кантактаў”. Была таксама мадэратарам прарасейскіх груп у фэйсбуку.
Паводле зьвестак з фэйсбуку, Кацярына Цывільская да 2013 году жыла ў Варонежы, дзе працавала ў Інтытуце высокіх тэхналёгій, варонескім філіяле Расейскай акадэміі дзяржаўнай службы і Варонескім дзяржаўным унівэрсытэце.
Цікавая інфармацыя зьмешчана ў інтэрнэце пра сувязі Цывільскай з Усоўскім. Яшчэ ў пачатку 2017 году хакеры з групы Ukrainian Cyber Alliance апублікавалі інфармацыю пра тое, што ў 2014 годзе Ўсоўскі атрымаў ад расейскага алігарха Малафеева 100 тысяч эўра на арганізацыю антыўкраінскіх акцый у Польшчы, Славакіі і Вугоршчыне. У Польшчы Ўсоўскі кантактаваў з арганізацыяй Obóz Wielkiej Polski, зь якім была зьвязана таксама Цывільская. Усоўскі таксама падтрымліваў сувязі з акружэньнем Матэвуша Піскорскага, былога дэпутата Сэйму ад Samoobrony, лідара партыі Zmiana, які цяпер знаходзіцца ў турме па абвінавачваньні ў шпіянажы на карысьць Кітаю і Расеі.
У перапісцы паміж Цывільскай і Усоўскім можна знайсьці шмат інфармацыі пра дзейнасьць расейскай грамадзянкі ў Польшчы, а таксама пра яе адносіны да Ўкраіны і бягучых палітычных падзей з 2014 да 2017 году.
Цывільская піша, што ў Польшчу была запрошана спадаром Мякішавым, выкладчыкам з Варонежу, які працаваў у Кракаве. Аднак жыцьцё ў Польшчы Цывільскай не спадабалася: „цяжка прывыкнуць, мяне ўсё раздражняе”. Але неўзабаве пасьля пераезду яна выйшла замуж за жыхара Кракава — Міхала Ц.
Яшчэ ў 2015 годзе Цывільская хацела вярнуцца ў Расею, але Ўсоўскі пераконваў яе застацца. Праз жанчыну Ўсоўскі шукаў у Польшчы арганізацыі і людзей, якія маглі б распаўсюджваць расейскую прапаганду. Таксама Ўсоўскі зьбіраўся праз рахунак Цывільскай плаціць польскім журналістам, якія б згадзіліся пісаць прарасейскія матэрыялы.
вк