Абаронцаў Курапатаў арыштавалі на 10 сутак

Натальля Гарачка асуджаная Партызанскім раённым судом Менску на 10 сутак арышту. Суд быў 2 ліпеня, у выходны дзень.

«Натальля знаходзіцца ў турме на Акрэсьціна, адбывае пакараньне, мы ужо вазілі ёй перадачу», — паведаміла Свабодзе сяброўка Гарачкі, актывістка Галіна Лагацкая.

1 ліпеня Натальля Гарачка была затрыманая пад брамай рэстарану «Поедем поедим», што знаходзіцца каля Курапатаў. Сьведка затрыманьня паведаміў, што праз 15 хвілін пасьля зьяўленьня актывісткі на пікеце да рэстарану пад’ехаў адмысловы міліцэйскі аўтамабіль, зь якога выйшлі тры чалавекі, паказалі пасьведчаньні супрацоўнікаў міліцыі і прапанавалі актывістцы праехаць зь імі.

Раніцай таго ж дня ў Менску былі затрыманыя Павал Севярынец, Вольга Мікалайчык і Дзяніс Урбановіч. Павал Севярынец і Вольга Мікалайчык асуджаныя на 10 сутак арышту.

З пачатку чэрвеня Натальля Гарачка брала удзел ў пікетаваньні рэстарацыі каля Курапатаў, часта вяла адтуль стрымы ў Фэйсбук, міліцыянты склалі на яе каля 10 пратаколаў за парушэньне Правілаў дарожнага руху і ўдзел у несанкцыянаванай акцыі.

svaboda.org/яс