Расеец разьліў у аэрапорце ў Тбілісі небясьпечную сумесь

Грузінскія сілы бясьпекі затрымалі грамадзяніна Расеі, які, на іх думку, разьліў у аэрапорце невядомую сумесь. Справа расьсьледуецца контрразьведкай Грузіі.

Лекары ацэньваюць стан пацярпелых як стабільны, іх жыцьцю нішто не пагражае.

У панядзелак раніцай з офіса Аэрафлота пачаў разыходзіцца непрыемны пах. "Прычыны спачатку высьвятляў тэхнічны пэрсанал аэрапорта, а затым мы паведамілі ў МУС", – сказаў у сераду кіраўнік прэс-службы аэрапорта Георгій Гоглідзе.

Агенцтва ТАСС паведаміла, што ўсе пацярпелыя адчувалі аднолькавыя сымптомы: галавакружэньне, млоснасьць, запаленьне сьлізістай абалонкі вачэй.

Доктар у шпіталі, які займаўся супрацоўнікамі аэрапорта, паведаміў журналістам, што да гэтага часу не вядома, што стала прычынай атручваньня. "Мы маем справу з таксычнымі эфэктамі нявызначанага рэчыва", – падкрэсьліў ён.

Трое пацярпелых выйшлі са шпіталя, астатнія пакінуць бальніцу "ў бліжэйшы час", – адзначыў мэдык.

яс