Сёньня паводле падазрэньня ў зьдзяйсьненьні злачынства затрыманыя Марына Золатава, Ганна Калтыгіна, Тацьцяна Каравянкова, – паведаміў Сьледчы камітэт.
»У выніку зьдзейсьненага злачынства РУП «БелТА» нанесеная істотная шкода, якая выявілася ў неправамерным завалоданьні й выкарыстаньні абароненай ад пабочнага доступу інфармацыі, а таксама падрыве дзелавой рэпутацыі прадпрыемства. Да гэтай супрацьпраўнай дзейнасьці датычныя службовыя асобы выдавецкага дома «Беларуская навука», ЗАТ «БелаПАН», ТАА «ТутБай Медыя».
Супрацоўнікі Сьледчага камітэта Беларусі праводзяць вобыск у інфармацыйнай кампаніі БелаПАН.
Атрымаць больш дакладную інфармацыю зараз немагчыма, бо ў рэдакцыю нікога з работнікаў БелаПАН не пускаюць. Пры гэтым у самім офісе знаходзяцца трое супрацоўнікаў кампаніі, але сувязі з імі няма.
Вядома, што паралельна з вобыскам у офісе БелаПАН праводзіўся вобыск на дачы ў яе міжнароднага аглядальніка Тацьцяны Каравянковай, якая, зыходзячы з паведамленьня Сьледчага камітэта, падазраецца ў «несанкцыянаваным доступе да кампютарнай інфармацыі».
Галоўны рэдактар інфармагенцтва БелаПАН Ірына Леўшына лічыць падазрэньні, выстаўленыя на адрас Тацьцяны Каравянковай, беспадстаўнымі і абсурднымі, бо інфармацыя агенцтва БелТА, якую БелаПАН выкарыстоўваў у сваіх навінах, бралася з адкрытых крыніц, разьмяшчалася ў адкрытым доступе ў стужцы навін і заўсёды – з гіперспасылкай на сайт БелТА.
Ірына Леўшына лічыць, што ўлады выкарыстоўваюць агенцтва БелТА для таго, каб перашкодзіць працы недзяржаўнага інфармацыйнага агенцтва.
Зараз стужка навін БелаПАН абнаўляецца нерэгулярна з-за аб'ектыўных прычын, аднак найбліжэйшым часам рэдакцыя паспрабуе наладзіць нармальную працу агенцтва.
Вядома, што ўжо некалькі гадзін вобыск таксама праходзіць у офісе найбуйнейшага беларускага недзяржаўнага інтэрнэт-партала tut.by , некаторыя яго супрацоўнікі, у тым ліку галоўны рэдактар Марына Золатава, затрыманыя.
Сьледчы камітэт раніцай 7 жніўня паведаміў, што «паводле матэрыялаў праверкі, праведзенай супрацоўнікамі МУС, распачатая крымінальная справа на падставе ч. 2 арт. 349 Крымінальнага кодэкса (несанкцыянаваны доступ да кампютарнай інфармацыі, учынены з іншай асабістай зацікаўленасьці, які пацягнуў прычыненьне істотнай шкоды)».
Падставай да распачынаньня крымінальнай справы паслужыла «паведамленьне »БелТА« аб збоях пры ажыцьцяўленьні доступаў да платнай падпіскі паслуг».
Згодна з паведамленьнем СК, падчас праверкі супрацоўнікамі МУС «выяўленыя шматлікія факты неправамернага доступу да кампютарнай інфармацыі, уласьнікам якой зьяўляецца »БелТА«.
БелаПАН/яс