Трамп: Ня будзе сумесных ваенных манэўраў з Паўднёвай Карэяй

Прэзыдэнт ЗША заявіў, што ня будзе сумесных ваенных манэўраў з Паўднёвай Карэяй.

Дональд Трамп паведаміў аб гэтым На Твітэры і напісаў, што няма ніякага сэнсу марнаваць на іх грошы. Адзначыў, што Паўночная Карэя «знаходзіцца пад велізарным ціскам з боку Кітая», які падтрымлівае Пхеньян. Дональд Трамп думае, што прычынай гэтага зьяўляюцца гандлёвыя спрэчкі ЗША з кітайскім урадам.

Амэрыканскі лідэр дадаў, што ён «лічыць, што адносіны з Кім Чэн Ынам вельмі добрыя і цёплыя, і ў цяперашні час няма падстаў марнаваць вялікія сумы на сумесныя ваенныя гульні з Паўднёвай Карэяй». Ён падкрэсьліў, аднак, што калі надумае, то ў любы час можа пачаць сумесныя манэўры з Паўднёвай Карэяй і Японіяй. «Калі гэта адбудзецца, яны будуць значна большыя, чым калі-небудзь раней», – напісаў Дональд Трамп.

Ваенныя вучэньні былі прыпыненыя пасьля гістарычнай сустрэчы Дональда Трампа і Кім Чэн Ына, якая адбыўся ў чэрвені ў Сінгапуры.

яс