У Польшчы сьвяткуюць «Дажынкі»

Сяляне і фэрмэры з усёй Польшчы прыехалі на Ясную Гуру ў Чанстахову, каб падзякаваць Маці Божай за ўраджай гэтага года. Тут праходзіць агульнанацыянальнае сьвята «Дажынкі».

Асноўныя ўрачыстасьці з удзелам прэзыдэнта Анджэя Дуды пачаліся аб 11.00 з урачыстай імшы.

Прэзыдэнт сказаў, што за апошнія сто гадоў польскія сяляне клапаціліся пра сваю радзіму і пралівалі кроў за яе.

Традыцыйна сьвята ўраджаю суправаджаецца ўжо 27-й па ліку Нацыянальнай сельскагаспадарчай выстаўкай, у якой прымаюць удзел больш за 400 экспанэнтаў.

У праграме сьвята таксама канцэрты фальклёрных гуртоў, дэгустацыя рэгіянальных страў у рамках 19-га Тыдня эўрапейскай народнай культуры.

Фэстываль ўраджаю на Яснай Гуры праводзіцца на працягу 36 гадоў у першыя выхадныя верасьня.

IAR/вк