У Варшаву зь Менска прыяжджала вядомы шэф-кухар, знаўца беларускай кухні Алена Мікульчык. Завітала яна і ў беларускую студыю Польскага радыё і падзялілася гісторыяй супольных беларуска-польскіх страў.
У нас багатая сумесная гісторыя, мусяць жа быць і супольныя стравы.
Алена Мікульчык расказала, што беларусы і палякі ядуць адну і тую ж страву — бігас або бігус. Чым жа адрозьніваюцца па складальніках гэтыя амаль падобныя па назьве стравы? Кухар зь Менску расказала пра важныя дэталі рэцэптуры і гатаваньня. Самае галоўнае, што трэба ведаць: галоўны складальнік бігуса — не капуста, а мяса зь лімонам. А квашаная капуста зьявілася потым — у таньнейшым варыянце. А бігас — гэта сьвежая квашаная капуста з даданымі мяснымі вырабамі, як мінімум пяці відаў. А ячшэ, адзначае Алена Мікульчык, існуе нямецкая разнавіднасьць гэтай стравы. І ўсё ж, у параўнаньні зь Беларусьсю, гэта страва больш распаўсюджана менавіта ў Польшчы. Дарэчы, кажа кулінар, бігус (бігас) можна замарожваць.
Яшчэ адна страва, якая аб’ядноўвае беларусаў і палякаў, — гэта жур, або журак. Але тым-сім рэцэпты па розныя бакі Буга ўсё ж адрозьніваюцца, пераконвае Алена Мікульчык. Беларускі жур на аўсянай муцэ, а польскі — на жытняй.
Для беларуса, які ні разу не бываў у Польшчы і не заходзіў у варшаўскі або кракаўскі рэстаран, будзе зьдзіўленьнем, што існуе вялікая розьніца паміж беларускімі пірагамі і польскімі pierogami. Польскія pierogi падобныя да расейскіх пельменяў. Дарэчы, у Польшчы pierogi называюць яшчэ ruskimi, што можа сьведчыць пра іх сувязь з Русьсю, г. зн. у тым ліку зь Беларусьсю.
У Беларусі і ня толькі існуе такая традыцыя ў рэстаранах нацыянальнай кухні — падаваць суп у бохане хлеба, зь якога перад гэтым дасталі мякіш. Наколькі аўтэнтычная гэта традыцыя, пацікавіўся я ў Алены Мікульчык. Кухар кажа, што гэта зусім не традыцыя. Беларусы ніколі так да хлеба не адносіліся. Хлеб ня мог служыць посудам. Але цяпер такі звычай, падгледжаны, мабыць, на Захадзе, увайшоў у моду.
А на дэсэрт Алена Мікульчык расказала гісторыю пра тое, адкуль у Польшчу дый у Беларусь прыйшла смачная салодкая шарлётка. Якая ў самым пачатку свайго шляху на нашы сталы была зусім не салодкая, але смачная. І яе шлях ва Ўсходнюю Эўропу ішоў праз Англію, Францыю і... Расею.
Віктар Корбут
Слухайце далучаны гукавы файл