Летува: Беларусь спрабуе абыйсьці забарону на пастаўку электраэнэргіі БелАЭС

Летувіскія спэцслужбы высока ацэньваюць верагоднасьць таго, што Беларусь паспрабуе абыйсьці заканадаўчую забарону Летувы на пастаўку электраэнэргіі, што вырабляецца небясьпечнымі атамнымі станцыямі, да якіх афіцыйны Вільнюс залічае Беларускую АЭС.

Аналіз сытуацыі з БелАЭС апублікаваны на сайце Дэпартамэнта дзяржаўнай бясьпекі (ДДБ).

«Беларусь хацела б экспартаваць электраэнергію ня толькі ў рэгіён Эўразійскага эканамічнага саюза, але і ў краіны Балтыі», напісана ў дакумэнце.

Аўтары справаздачы адзначылі, што прадстаўнікі Беларусі і дзяржкарпарацыі «Расатам», па чыім праекце і з чыёй дапамогай будуецца БелАЭС (...) імкнуцца паказаць сябе ў выгодным сьвятле перад экспэртамі Групы эўрапейскіх рэгулятараў ў сфэры ядзернай бясьпекі (ENSREG) і Міжнароднага агенцтва па атамнай энэргіі (МАГАТЭ).

«Беларусь перабольшвае кожны станоўчы водгук экспэртаў МАГАТЭ і перамяншае або хавае любую крытыку міжнародных экспэртаў», - адзначаюць летувіскія аналітыкі.

Увод у эксплуатацыю першага энэргаблёка заплянаваны на сьнежань 2019 года, другога - на ліпень 2020 га. Мяркуецца, што атамная станцыя будзе выпрацоўваць 18 млрд кВт⋅ч электраэнэргіі штогод.

Летува зьяўляецца самым актыўным крытыкам БелАЭС.

15 чэрвеня 2017 года летувіскі Сойм прыняў закон аб прызнаньні Беларускай АЭС небясьпечнай і ўяўляе пагрозу для нацыянальнай бясьпекі Летувы, навакольнага асяродзьдзя і грамадзкага здароўя. Раней парлямэнт Летувы прыняў закон, закліканы абмежаваць імпарт электраэнэргіі з Беларусі й Расеі.

naviny.by/яс