Некамэрцыйныя арганізацыі правялі слуханьні

Пытаньні ўдасканаленьня прававых умоў для дзейнасьці некамерцыйных арганізацый абмяркоўваліся 9 кастрычніка ў Менску на грамадзкіх слуханьнях.

Як адзначыў юрыст Асамблеі няўрадавых дэмакратычных арганізацый Юрый Чавусаў, ідэя правядзеньня слуханьняў узьнікла пасьля прыняцьця 30 траўня Палатай прадстаўнікоў у першым чытаньні паправак у некаторыя законы па пытаньнях дзейнасьці палітычных партый і іншых грамадзкіх арганізацый.

9 ліпеня 25 некамэрцыйных арганізацый зьвярнуліся ў ніжнюю палату парлямэнта з прапановай правесьці парлямэнцкія слуханьні па тэме "Ўдасканаленьне прававых умоў для стварэньня і дзейнасьці грамадзкіх аб'яднаньняў і іншых некамэрцыйных арганізацый". 29 ліпеня з Палаты прадстаўнікоў быў атрыманы адказ аб немэтазгоднасьці правядзеньня парлямэнцкіх слуханьняў.

Тым ня менш Цэнтар прававой трансфармацыі і Асамблея няўрадавых дэмакратычных арганізацый вырашылі ініцыяваць правядзеньне грамадзкіх, альтэрнатыўных парлямэнцкім, слуханьняў, на якія запрашаліся ў тым ліку прадстаўнікі парлямэнту. Аднак у ніжняй палаце парлямэнту лічаць правядзеньне слуханьняў "неактуальным" у сувязі з прыняцьцем законапраекта ў другім чытаньні 2 кастрычніка, удзел жа дэпутатаў у іх — "немэтазгодным".

У аналізе прынятага ў другім чытаньні законапраекту няўрадавыя арганізацыі прыйшлі да высновы, што дакумэнт "прадугледжвае некаторыя тэхнічныя пазытыўныя нормы ў параўнаньні зь дзейным заканадаўствам Беларусі аб грамадзкіх аб'яднаньнях". У той жа час, няўрадавыя арганізацыі мяркуюць, што ў закон неабходна ўнесьці шэраг зьмянаў.

БелаПАН\эб