Тацьцяна Караткевіч падала дакумэнты на рэгістрацыю кандыдатам у дэпутаты

У пятніцу, 29 ліпеня, экс-кандыдатка ў прэзыдэнты, сустаршыня кампаніі «Гавары праўду» Тацьцяна Караткевіч падала дакумэнты на рэгістрацыю кандыдатам у дэпутаты па Кастрычніцкай акрузе № 97 Менска.

«Тры тыдні я й мая каманда зьбіралі подпісы: хадзілі па кватэрах, стаялі ў пікетах. У выніку сабралі 1.400 подпісаў», – паведаміла яна БелаПАН.

Караткевіч спадзяецца, што яе зарэгіструюць і што яна зможа «яшчэ больш людзей азнаёміць з праграмай «Гавары праўду», яе бачаньнем будучыні». «Шмат людзей, якія падыходзяць да мяне, кажуць мне, каб я ішла наперад, жадаюць посьпеху», – сказала палітык.

Караткевіч адзначыла, што астатнія прэтэндэнты ў дэпутаты ад «Гавары праўду» будуць падаваць дакумэнты на рэгістрацыю кандыдатамі ў дэпутаты 1 жніўня.

Якіх-небудзь прэтэнзій з боку акруговай камісіі да яе ініцыятыўнай групы не было, адзначыла Караткевіч.

З 29 прэтэндэнтаў толькі пяцёра маюць вопыт удзелу ў парлямэнцкіх выбарах у якасьці кандыдатаў у дэпутаты, дзьве траціны – увогуле ня мелі дачыненьня да актыўнай палітыкі.

Тацьцяна Караткевіч удзельнічала ў выбарах 2015 года ў якасьці кандыдата ў прэзыдэнты.

вс