У 2017 годзе Беларусь плянуе пачаць экспарт ялавічыны ў Кітай
PR dla Zagranicy
Valery Sauko
28.10.2016 18:11
Затым плянуецца сэртыфікаваць птушкагадоўчыя гаспадаркі, каб адпраўляць у Паднябесную й мяса птушкі.
pixabay.com/Public Domain CC0
У 2017 годзе Беларусь плянуе адправіць першыя партыі айчыннай ялавічыны ў Кітай. Аб плянах па экспарту прадукцыі мясаперапрацоўчых прадпрыемстваў Беларусі ў Кітай паведаміў міністар сельскай гаспадаркі й харчаваньня Леанід Заяц.
Паводле яго слоў, на першапачатковым этапе размова ідзе пра экспарт ялавічыны ў КНР. Затым плянуецца сэртыфікаваць птушкагадоўчыя гаспадаркі, каб адпраўляць у Паднябесную й мяса птушкі. Цяпер група кітайскіх экспэртаў працуе на чатырох беларускіх мясаперапрацоўчых прадпрыемствах. Яны ўдзельнічаюць у атэстацыі вытворчасьцей.
У сваю чаргу начальнік упраўленьня зьнешнеэканамічнай дзейнасьці Мінсельгасхарча Аляксей Багданаў заявіў, што ўзровень самазабесьпячэньня мясам у Беларусі складае 133%. У 2015 годзе ў краіне было выраблена 121 кг мяса й мясапрадуктаў на душу насельніцтва, а спажываньне - 89 кг.
Ён падкрэсьліў, што па вытворчасьці мяса на душу насельніцтва Беларусь саступае толькі Нідэрляндам, ЗША й Канадзе. «Паводле папярэдніх дадзеных, да 2020 года наша доля ў сусьветнай вытворчасьці застанецца нязьменнай. У той жа час вытворчасьць і экспарт плянуецца істотна павялічыць», - сказаў ён.
Белстат вылічыў, што за год адзін беларус зьядае 170 кг бульбы й 89 кг мяса.
белта/вс