Праграма Беларусі з МВФ мяркуе прыватызацыю дзяржпрадпрыемстваў

Умовы праграмы Беларусі з Міжнародным валютным фондам прадугледжваюць прыватызацыю прадпрыемстваў. Паводле інфармацыі БелаПАН, уладам трэба ўзгадніць пералік дзяржактываў, у дачыненьні да якіх павінна ажыцьцяўляцца перадпрадажная падрыхтоўка.

«Папярэднія ўмовы праграмы з МВФ прадугледжваюць, што павінна ажыцьцяўляцца перадпрадажная падрыхтоўка дзесяці прадпрыемстваў. Пакуль пералік такіх прадпрыемстваў не ўзгоднены на дзяржаўным узроўні», – паведаміў БелаПАН экспэрт у фінансавых колах.

Акрамя таго, экспэрты Міжнароднага валютнага фонду рэкамэндуюць беларускім уладам у мэтах павышэньня эфэктыўнасьці дзяржсэктара перадаць дзяржпрадпрыемства ад міністэрстваў і канцэрнаў пад кіраваньне адзінай структуры.

«Пакуль усё гэта на ўзроўні прапановаў, дыскусій. Аднак калі будзе стварацца холдынг і ён стане рынкавых чынам кіраваць дзяржпрадпрыемствамі, то міжнародныя фінансавыя арганізацыі гатовы дапамагчы Беларусі ў гэтым кірунку і прыцягнуць спэцыялістаў, якія ведаюць, як гэтая сыстэма кіраваньня дзяржпрадпрыемствамі працуе ў сьвеце», – сказаў экспэрт.

Беларусь вядзе перамовы з МВФ, неабходныя для заключэньня крэдытнай праграмы з фондам, ужо практычна два гады. Працэс гэты пачаўся вясной 2015 года, калі беларускія ўлады ў супрацоўніцтве з Сусьветным банкам сталі рыхтаваць «дарожную карту» па рэфармаваньні эканомікі.

Аднак бакам пакуль не ўдалося выйсьці на падпісаньне новай крэдытнай праграмы.

tut.by/ав