Вярхоўны суд пакінуў у сіле папярэджаньне Руху «За Свабоду»
PR dla Zagranicy
Alena Vialichka
25.05.2017 14:23
Судзьдзя палічыла, што рух мусіць несьці адказнасьць за дзеяньні сяброў арганізацыі, якія парушылі заканадаўства.
pixabay.com/Public Domain CC0
Судзьдзя Нэлі Каўшун палічыла, што Рух «За Свабоду» мусіць несьці адказнасьць за дзеяньні сяброў арганізацыі, якія па дадзеных Міністэрства юстыцыі парушылі заканадаўства.
Міністэрства юстыцыі вынесла ў канцы сакавіка папярэджаньне Руху «За Свабоду» за тое, што арганізатары сьвяткаваньня Дня Волі заклікалі людзей на акцыю да атрыманьня афіцыйнага дазволу. Па рашэньню Рады арганізацыя абскардзіла папярэджаньне ў Вярхоўным судзе.
Лідар Руху «За Свабоду» Юры Губарэвіч падкрэсьліў, што сябра арганізацыі Аляксандар Русевіч пры падачы заяўкі для правядзеньня акцыі на Дзень Волі выступаў як фізычная асоба, а пры падачы заяўкі ад юрасобы дзейнічае іншая працэдура.
Прадстаўнікі Руху на судзе падкрэсьлівалі, што арганізацыя, паводле заканадаўства, не нясе адказнасьці за дзеяньні сваіх сяброў, інакш гэта «падрывае асновы права, у прыватнасьці, прыкмету стабільнасьці».
У сваю чаргу пракурор заявіў пра тое, што Рух «За Свабоду» па сутнасьці зьяўляецца арганізатарам Дня Волі і падтрымаў пазыцыю прадстаўніка Міністэрства юстыцыі.
Судзьдзя падтрымала пазыцыю адказчыка па справе і пакінула папярэджаньне ў сіле.
Рух "За Свабоду"/ав