Улады выгналі аднаго зь лепшых каталіцкіх сьвятароў

Улады Беларусі адмовілі ў наданьні беларускага грамадзянства каталіцкаму сьвятару з Гомеля Славаміру Ляскоўскаму, які пасьля 28 гадоў служэньня павінен быў вярнуцца ў Польшчу, хаця 5 гадоў таму падаваў прашэньне аб грамадзянстве Рэспублікі Беларусь.

Сустаршыня Беларускай хрысьціянскай дэмакратыі Віталь Рымашэўскі раскрытыкаваў гэты факт. «Чаму ў Беларусі даюць грамадзянства Бакіеву і адмаўляюць таму, хто аддаў служэньню Богу і беларусам 28 год?!! Сваім служэньнем а. Славамір дапамагаў людзям і спрашчаў працу дзяржаве, якая ня можа належным чынам выконваць свае сацыяльныя абавязкі. Ён дапамагаў абяздоленым, дзецям- інвалідам, наркаманам, алькаголікам, бамжам».

Віталь Рымашэўскі выказаў падзяку айцу Славаміру й папрасіў прабачэньня, што »беларусы пакуль няздольныя яго прыняць і абараніць».

Паводле bchd.info/яс