У школах Беларусі – апошні званок

Апошні званок сёньня празвініць для 57 тысяч выпускнікоў па ўсёй краіне – перадае партал TUT.BY.

30 траўня ва ўсіх школах Беларусі праходзяць урачыстыя лінейкі з нагоды завяршэньня навучальнага году. Школы, гімназіі й ліцэі ў гэтым годзе заканчваюць 57 256 хлопцаў і дзяўчат. У 2016-м іх было практычна столькі ж – 57 400.

Больш за ўсё выпускнікоў гэтай вясной на Берасьцейшчыне – 10 650, зусім няшмат ад вобласці адстае Менск – 9199. А найменш за ўсё выпускнікоў 11-х клясаў налічваецца на Гарадзеншчыне – 6297.

9 і 10 чэрвеня 11- клясьнікаў чакаюць выпускныя вечары. 12 чэрвеня пачнецца цэнтралізаванае тэставаньне. Традыцыйна першымі пісаць заданьні будуць тыя, хто захацеў здаваць беларускую мову. 14 чэрвеня будуць здаваць тэсты па расейскай мове.

ВНУ Беларусі плянуюць набраць на бясплатную форму навучаньня 27,1 тысячы абітурыентаў, па платную – 31 тысячу. Уступная кампанія ва ўнівэрсытэты працягнецца з 12 ліпеня да 6 жніўня.

TUT.BY/ап