Аднавіўся беларуска-польскі дыялёг гісторыкаў
PR dla Zagranicy
Jury Lichtarowicz
02.06.2017 18:28
З дыялёгу выключаныя незалежныя дасьледчыкі беларуска-польскіх стасункаў.
На гістарычным факультэце БДУ праходзіць беларуска-польскі круглы стол.
Тэма сустрэчы — «Дыялёг гісторыі/Гісторыя дыялёгу. Складаныя пытаньні ў гісторыі Беларусі і Польшчы, іх адлюстраваньне ў гістарыяграфіі абедзьвюх краінаў і пэрспэктывы для збліжэньня навуковых пазыцый».
Цягам двух дзён удзельнікі маюць абмеркаваць розныя ацэнкі складаных і спрэчных гістарычных праблемаў, а таксама прадставяць свае навуковыя падыходы да іх вырашэньня.
У адкрыцьці дыялёгу ўдзельнічалі амбасадар Польшчы ў Беларусі Кондрад Паўлік, прарэктар у вучэбнай рабоце БДУ Сяргей Ходзін, дэкан гістарычнага факультэту Белдзяржунівэрсытэту Аляксандар Каханоўскі, прарэктар у пытаньнях адукацыі Ўнівэрсытэту ў Беластоку Войцэх Сьляшыньскі, дырэктар Польскага інстытуту ў Менску Матэвуш Адамскі.
Да абмеркаваньня запрошаныя прадстаўнікі шматлікіх ВНУ Беларусі і Польшчы. Аднак шэраг незалежных беларускіх гісторыкаў, абазнаных у тэме беларуска-польскіх стасункаў, запрашэньня на мерапрыемства не атрымалі.
Пасьля сустрэчы ў Менску на вясну наступнага года заплянавана аналягічнае пасяджэньне ў Польшчы ў Беластоку.
Паводле Радыё “Свабода”/юл