Дэлегацыя Эўрапарлямэнта наведае Беларусь

Дэлегацыя ў складзе пяці чальцоў Эўрапейскага парлямэнта 18—19 ліпеня наведае Беларусь. Як паведамляе прэс-служба прадстаўніцтва Эўразьвязу ў Менску, гэта другі афіцыйны візыт у Беларусь прадстаўнікоў Эўрапарлямэнта на чале з кіраўніком дэлегацыі ЭП па сувязях з Беларусьсю Богдана Здраеўскага. У складзе дэлегацыі парлямэнтарыі Германіі, Латвіі, Летувы і Польшчы, якія прадстаўляюць чатыры палітычныя групы Эўрапейскага парлямэнта.

Дэлегацыя сустрэнецца з прадстаўнікамі ўраду і парлямэнта Беларусі, каб „абмеркаваць ключавыя пытаньні двухбаковых адносін ЭЗ і Беларусі і перашкоды па шляху да больш цеснай супрацы, якія яшчэ застаюцца”. Дэлегацыя таксама сустрэнецца з прадстаўнікамі апазыцыі і грамадзянскай супольнасьці, каб „даведацца пра іх дзейнасьць і перашкоды, з якімі яны сутыкаюцца”.

racyja.com/БелаПАН/яс