Беларускі парлямэнт выступіў супраць зносу савецкіх помнікаў у Польшчы

Беларускі парлямэнт выступіў супраць зносу помнікаў Чырвонай Арміі ў Польшчы. Такую заяву сёньня прыняла камісія Палаты прадстаўнікоў па міжнародных справах.

Пляны афіцыйнай Варшавы дэпутаты назвалі праявай мэтанакіраванага перапісваньня гісторыі, перагляду вынікаў Другой сусьветнай ды гераізацыі нацызму. Палата прадстаўнікоў заклікае ўсе дзяржавы падтрымліваць у добрым стане вайсковыя пахаваньні ды помнікі, што паўсталі ў гонар ахвяраў вайны.

Ініцыятарам сёньняшняй заявы выступіла Лібэральна-дэмакратычная партыя, паведаміў на сваёй старонцы ў Фэйсбуку адзін зь яе лідэраў Алег Гайдукевіч. Нагадаем, у панядзелак прэзыдэнт Польшчы Анджэй Дуда ўхваліў дакумэнт, які прадугледжвае ліквідацыю амаль пяцісот помнікаў савецкага пэрыяду.

св/tut.by