Моладзь БНФ пачала выбарчую кампанію

Першым сваю дзейнасьць па выбарчай кампаніі пачаў кіраўнік Моладзі БНФ Юрый Лукашэвіч, які вылучаецца кандыдатам у дэпутаты па Залінейным раёне горада Барысава. 30 жніўня ён разам зь некалькімі актывістамі пачаў збор подпісаў за будаўніцтва новай сучаснай паліклінікі на тэрыторыі Залінейнага раёна.

Як распавядаюць актывісты, людзі вельмі пазытыўна рэагавалі на дадзеную ініцыятыву ды актыўна падпісваліся. Шмат хто казаў, што сапраўды даўно трэба было заняцца гэтай праблемай, бо існуючая паліклініка на самай справе не спраўляецца са сваім прызначэньнем.

Актывісты зрабілі таксама абыход раёна, дзе высьвятлялі найбольш важныя праблемы. У першую чаргу гэта дрэнныя дарогі, занядбаны мясцовы пляж, небясьпечны доступ да вадаёма.

У бліжэйшы час першая дзясятка падрыхтаваных кандыдатаў распачне свае кампаніі. Усяго Моладзь БНФ плянуе выставіць 50 кандыдатаў на мясцовыя выбары.

Паводле moladz.info/юл