Сямашка задаволены перамовамі Лукашэнкі й Мадуры – мэта дасягнутая
PR dla Zagranicy
Valery Sauko
05.10.2017 17:36
Паводле словаў віцэ-прэм'ера Беларусі Ўладзіміра Сямашкі, галоўная мэта перамоў Аляксандра Лукашэнкі й Нікаляса Мадуры дасягнутая.
PAP/EPA/TATYANA ZENKOVICH
Сямашка падкрэсьліў, што Менск і Каракас дамовіліся надаць новы імпульс у двухбаковых адносінах, перш за ўсё, у эканоміцы. Нагадаем, прэзыдэнт Вэнэсуэлы знаходзіцца зь візытам у Менску.
Беларускі чыноўнік адзначыў, што праца працягваецца нягледзячы на тое, што ў апошнія гады лічбы гандлёва-эканамічнага балянсу прыкметна скараціліся.
«Сёньня, дарэчы, лейтматыў усёй размовы быў, што нам трэба аднавіць гэтыя адносіны на зусім іншым узроўні. Базіс у нас ёсьць. У нас пабудаваныя ў Вэнэсуэле цалкам новыя асноўныя фонды – новыя заводы, якія могуць вырабляць канкурэнтаздольную прадукцыю», – адзначыў Сямашка.
Ён таксама паведаміў, што па даручэньні Лукашэнкі й Мадуры будзе скарэкціраваная дарожная карта супрацоўніцтва. Адпаведныя пытаньні будуць абмяркоўвацца ў лістападзе ў Менску на пасяджэньні двухбаковай міжурадавай камісіі.
белта/naviny.by/вс