Амэрыканская кампанія будзе распрацоўваць бесьпілётныя аўто ў Беларусі
PR dla Zagranicy
Alaksandar Papko
03.11.2017 14:23
Супрацоўнічаць зь ёй будуць стваральнікі знакамітай праграмы MAPS.ME.
pixabay.com/Public Domain/CC0
Амэрыканская кампанія MapBox абвясьціла пра адкрыцьцё цэнтру дасьледаваньняў і распрацоўкі на базе беларускай фірмы MapData – паведамляе партал TUT.BY. Фірма з ЗША таксама зьбіраецца стаць рэзыдэнтам беларускага Парку высокіх тэхналёгіяў.
Менскія праграмісты з MapData будуць распрацоўваць тэхналёгіі для бесьпілётных аўтамабіляў. Гэтым жа зараз цікавяцца Tesla, Google, Uber і найбуйнейшыя сусьветныя аўтавытворцы.
У MapData працуюць былыя супрацоўнікі картаграфічнага сэрвісу MAPS.ME, які ў 2014 годзе набыла расейская кампанія Mail.Ru Group. Пасьля зьдзелкі каманда пераехала ў Маскву, а калі абавязацельствы скончыліся, вярнулася ў Менск.
MapBox – кампанія з ЗША, якая дае плятформу для стварэньня пэрсаналізаваных мапаў. Цяпер прадуктамі MapBox карыстаюцца каля 300 мільёнаў чалавек.
tut.by/ап