Менск заключыў кантракт на пастаўку ядзернага паліва
PR dla Zagranicy
Alaksandar Papko
28.12.2017 14:17
Першыя цеплавыдзяляльныя элемэнты для атамнай станцыі прыбудуць з Расеі ўжо ў 2018 годзе.
Беларуская АЭС падчас будаўніцтва, восень 2017 году Włodzimierz Pac/Polskie Radio
Кіраўніцтва кампаніі «ТВЭЛ» – падразьдзяленьня карпарацыі «Росатом», якое займаецца пастаўкай паліўных элемэнтаў – і адміністрацыя Беларускай АЭС заключылі кантракт на пастаўку ядзернага паліва. Пра гэта паведамляе інфармагенцтва БелаПАН. Цеплавыдзяляльныя элемэнты будуць пастаўленыя на два энэргаблёкі атамнай электрастанцыі ў Астраўцы.
Першая пастаўка ядзернага паліва на БелАЭС чакаецца ў канцы 2018 году. Увод у эксплюатацыю першага энергаблёка заплянаваны на 2019 г., другога – на 2020-ы.
Кампанія «ТВЭЛ» забясьпечвае ядзерным палівам 75 энэргетычных блёкаў у Расеі й трынаццаці дзяржавах Эўропы й Азіі. Яна пастаўляе паліўныя стрыжні на 30 дасьледчых рэактараў у сьвеце, а таксама на ўсе транспартныя рэактары расейскага атамнага флёту.
naviny.by/ап