У Менску затрыманая група махляроў, якія інсцэнізавалі ДТЗ

У Менску была затрыманая група аўтамахляроў, якія з 2016 года інсцэнізавалі ДТЗ з удзелам дарагіх аўтамабіляў, застрахаваных на вялікія сумы з мэтаю атрыманьня страхавых выплат, паведамляе Міністэрства ўнутраных спраў.

Група з пяці чалавек ад 27 да 44 год валодала двума аўтамабілямі «KIA Quoris», застрахаванымі паводле сыстэмы КАСКА. Трэцюю машыну гэтай жа маркі, але разьбітую, удзельнікі купілі ў Расеі.

Падмяняючы найбольш дарагія запчасткі са сваіх машын на дэталі з аварыйнай і імітуючы ДТЗ, ад ліпеня 2016 па кастрычнік 2017 група здолела атрымаць страхавых выплат на 118 тысяч рублёў. Усяго яны паўтарылі схему ажно пяць разоў.

Затрыманым пагражае пакараньне паводле часткі 4 артыкула 209 КК РБ «Махлярства зьдзейсьненае ў буйным памеры арганізаванай групай асоб» – ад трох да дзесяці год пазбаўленьня волі.

nn.by/яс