Ваўкавыскі раён стаў самым беспрацоўным

Белстат абнавіў дадзеныя па беспрацоўі. У працэнтных суадносінах рэйтынг узначалілі Ваўкавыскі, Пастаўскі й Аршанскі раёны, па колькасьці беспрацоўных – Аршанскі, Маладзечанскі й Лідзкі.

У Ваўкавыскім раёне зарэгістраваліся 298 беспрацоўных, што складае 0,9% ад усяго працаздольнага насельніцтва. Гэта адзіны раён зь першай дзясяткі, дзе іх колькасьць вырасла – на 6,4%. У Аршанскім раёне зарэгістраваліся 509 беспрацоўных і гэта 0,8%. За год іх колькасьць там скарацілася амаль на траціну.

Самае вялікае скарачэньне беспрацоўных – у Камянецкім раёне (мінус 71,1%), а таксама ў Чавускім (мінус 69,7%) і Шчучынскім раёнах (мінус 65,8%).

Навуковы супрацоўнік Цэнтру эканамічных дасьледаваньняў BEROC Алег Мазоль лічыць, што афіцыйная статыстыка ў краіне моцна заніжаная.

- Арыентавацца на афіцыйныя дадзеныя ня варта, таму што яны не адлюстроўваюць рэальнай сытуацыі, – лічыць экспэрт.

Паводле яго слоў, для ўладаў гэта палітычнае пытаньне – паказаць, што ў краіне няма ніякага сацыяльнага напружаньня.

naviny.by/вс