Беларускія біятляністкі заваявалі золата на алімпіядзе ў Паўднёвай Карэі

Беларускія біятляністкі сталі алімпійскімі чэмпіёнкамі ў эстафэце на Зімовых гульнях у Пхёнчхане. Гістарычная для беларусак гонка адбылася 22 лютага.

На эстафэту трэнэрскі штаб беларускай зборнай на чале з аўстрыйскім адмыслоўцам Альфрэдам Эдэрам выставіў Надзею Скардыно, Ірыну Крыўко, Дынару Алімбекаву і Дар’ю Домрачаву.

Усю дыстанцыю беларускі прайшлі без штрафных колаў, у суме выкарыстаўшы 9 дадатковых патронаў.

Другое месца заняла каманда Швэцыі, трэцяе – Францыі.

За тры дні да заканчэньня Алімпійскіх гульняў у Пхёнчхане зборная Беларусі займала 15-е месца ў агульнакамандным мэдальным заліку – пасярэдзіне з трох дзясяткаў краінаў, чые прадстаўнікі станавіліся чэмпіёнамі і прызёрамі зімовай алімпіяды.

А. Лукашэнка павіншаваў беларускіх біятляністак з заваяваньнем алімпійскага золата. Спартсмэнкі ўзнагароджаныя ордэнамі „За асабістую мужнасьць”.

naviny.by/Радыё Свабода/нг