Мірны ход дазволенай імпрэзы на 100-годзьдзе БНР і хапун на плошчы

Сёньня ў беларускай рэчаіснасьці разварочваліся дзьве паралельныя падзеі – мірнаму сьвяткаваньню стагодзьдзя БНР каля Bялікага тэатру спадарожнічаў хапун на плошчы Якуба Коласа.

На дазволены ўладамі мітынг і канцэрт на Траецкай гары сабраліся шмат людзей (паводле Юрася Губарэвіча, каля 20 тыс.). У сваю чаргу забароненае шэсьце было задушана ў зародку. Такім чынам улады далі зразумець, што свабода, вельмі ўмоўная, існуе толькі ў вузкіх акрэсьленых рамках. Дарэчы, сьвяточныя мерапрыемствы дазволілі ня толькі ў Менску, але таксама ў шэрагу іншых гарадоў.

Пры гэтым зразумела, што стагодзьдзе БНР стала вялікай падзеяй толькі для адносна вузкага слоя сьвядомых людзей, крытычна настаўленых да сёньняшняй улады. Маса беларусаў абыякава ставіцца да гэтай даты ды агулам ня ведае або слаба ведае гісторыю нараджэньня беларускай дзяржаўнасьці.

Радыё Рацыя/нг