Беларусь адмовілася выдаць Кыргызстану былога прэм'ер-міністра

Генэральная пракуратура Беларусі адмовілася выдаць Кыргызстану былога прэм'ер-міністра гэтай краіны Даніяра Ўсенава, які ў Беларусі зьмяніў імя на Данііла Ўрыцкага.

Беларуская генпракуратура ўгледзела ў справе Ўсенава — Урыцкага палітычную падкладку.

У сьнежні 2017 года пракуратура Кыргызстана накіравала беларускім калегам хадайніцтва з просьбай «прыняць меры па вышуку і затрыманьні Даніяра Ўсенава, які зьмяніў свае анкетныя даныя на Данііла Ўрыцкага».

Усенаў у Кыргызстане завочна прысуджаны да пажыцьцёвага зьняволеньня за злоўжываньне службовым становішчам, саўдзел у забойстве, замах на забойства.

27 ліпеня адбылася ўрачыстая цырымонія пачатку рэалізацыі праекта Беларускай нацыянальнай біятэхналягічнай карпарацыі, дырэктарам якой зьяўляецца Ўрыцкі. 28 ліпеня ён прысутнічаў на сустрэчы Аляксандра Лукашэнкі з кіраўніцтвам кітайскай CITIC Group.

Даніяр Усенаў уваходзіў у каманду прэзыдэнта Кыргызстана Курманбека Бакіева, які ў 2010 годзе зь сям'ёй уцёк з краіны і па запрашэньні Аляксандра Лукашэнкі пражывае ў Беларусі.

News.tut.by/вк