Камандзір батальёна асуджаны на два гады за бязьдзейнасьць

Суд Барысаўскага раёна прысудзіў камандзіра 10-га асобнага батальёна радыёэлектроннай барацьбы Паўночна-заходняга апэратыўнага камандаваньня да 2 гадоў пазбаўленьня волі за бязьдзейнасьць.

Праходзячы службу, абвінавачаны атрымаў паведамленьне аб учыненых злачынствах. Аднак не зарэгістраваў іх, старшаму камандзіру (начальніку) не паведаміў, службовае расьсьледаваньне не прызначыў.

Абвінавачаны прызнаны вінаватым у наўмыснай бязьдзейнасьці ўлады, учыненай з асабістай зацікаўленасьці. Гэта пацягнула прычыненьне істотнай шкоды правам і законным інтарэсам грамадзян і дзяржаўным інтарэсам. Адбываць пакараньне ён будзе ў калёніі агульнага рэжыму.

Таксама прызначаны штраф 400 базавых велічыняў (9,8 тыс. рублёў) і пазбаўленьне права займаць пэўныя пасады на тэрмін 5 гадоў.

Мера стрыманьня ў дачыненьні да абвінавачанага зьмененая на заключэньне пад варту.

Прысуд у законную сілу не ўступіў і можа быць абскарджаны і апратэставаны ў апэляцыйным парадку.

nn.by/belta.by/яс