Гомельскі праваабаронца дамагаецца павелічэньня залаў на рэзанансныя судовыя справы

Намесьнік старшыні Менгарсуда Уладзімір Грыгаровіч адрэагаваў на скаргу гомельскага праваабаронцы Леаніда Судаленкі. У сталічным судзе мяркуюць, што гэта здарылася праз тое, што Леанід Судаленка не зьяўляецца ўдзельнікам судовага працэсу.

Прэтэнзіі праваабаронцы выклікала тое, што ў першы дзень суда над лідарамі прафсаюзу РЭП ён не змог трапіць на адкрытае судовае паседжаньне.

«Любы жадаючы павінен мець магчымасьць прысутнічаць у адкрытым судовым паседжаньні. Таму я не разумею, чаму я і яшчэ некалькі дзясяткаў чалавек не змаглі трапіць у залу судовых паседжаньняў толькі таму, што яна на 50 асобаў. Я казаў аб тым, што мне вельмі прыкра было глядзець, як былы кіраўнік краіны Станіслаў Шушкевіч, дзядуля з кійком, сядзіць у калідоры, таму што ён не мог туды трапіць», – распавядае Belsat.eu праваабаронца.

Ён кажа, што ягоная скарга – першы крок «стратэгічнай цяжбы». Пасьля атрыманьня адказу Леанід Судаленка ўжо зьвярнуўся ў суд Савецкага раёну Менску на дзеяньні раённага судзьдзі. Далей будзе суд першай інстанцыі.

«Я прайду ўсе ўнутраныя сродкі прававой абароны, і зьвярнуся ў індывідуальным парадку ў камітэт ААН па правах чалавека і запытаюся: ці галоснасьць вызначаецца памерам кабінэта судзьдзі?» – кажа праваабаронца.

Прысуд лідэрам Беларускага незалежнага прафсаюзу работнікаў радыёэлектроннай прамысловасьці (РЭП) Генадзю Фядынічу і Ігару Комліку суд Савецкага раёну Менску абвесьціць 24 жніўня.

belsat.eu/яс