У Менску абмяркоўвалі як прымусіць улады змагацца з хатнім гвалтам

У галерэі «Ў» у Менску ўдзельнікі суполкі ў «Фэйсбуку» «Маршыруй, дзетка!» абмеркавалі, як яны будуць змагацца за закон аб процідзеяньні хатняму гвалту.

5 кастрычніка Аляксандар Лукашэнка заявіў, што можна абысьціся зьменамі ў дзейныя законы, а не прымаць асобны супраць хатняга гвалту.

«Усё гэта дурасьць, узятая перш за ўсё з Захаду», — сказаў ён.

Падчас сустрэчы ў галерэі «Ў» прагучаў шэраг прапаноў, сярод іх асноўныя:

— дамагацца парлямэнцкіх слуханьняў у Палаце прадстаўнікоў;

— правесьці санкцыянаваны марш;

— стварыць агульны рух «Беларусь бяз гвалту»;

— стварыць пэтыцыі, арганізаваць збор подпісаў;

— закідаць адміністрацыі лістамі і зваротамі, паказаць, што не зьмірыліся з рашэньнем прэзыдэнта;

— правесьці грамадзкі трыбунал з удзелам ахвяраў гвалту.

Нядаўна створаная суполка ў «Фэйсбуку» «Маршыруй, дзетка!» ўжо аб’яднала больш за 1700 чалавек.

Кіраўніца прытулку для ахвяраў хатняга гвалту «Радзіслава» Вольга Гарбунова сказала карэспандэнту Свабоды, што людзі пачынаюць аб'ядноўвацца і адкрыта заяўляюць аб праблеме хатняга гвалту.

Кіраўніца аб’яднаньня «Гендэрныя пэрспэктывы» і сябра Нацыянальнай рады гендэрнай палітыкі Ірына Альхоўка, якая ў складзе рабочай групы пры МУС працавала над канцэпцыяй закону аб процідзеяньні хатняму гвалту, сказала, што праблема выйшла за межы арганізацый, якія прафэсійна ёй займаюцца.

svaboda.org/яс