Шайгу ў Менску прыгразіў адказам на разьмяшчэньне ў Польшчы дывізіі ЗША

«Пляны польскага ўрада разьмясьціць на пастаяннай аснове на сваёй тэрыторыі дывізію ўзброеных сіл ЗША контрпрадуктыўныя й не спрыяюць захаваньню стабільнасьці і ўмацаваньню рэгіянальнай бясьпекі», заявіў міністар абароны Расеі, генэрал арміі Сяргей Шайгу. Пра гэта ён сказаў у сераду, 24 кастрычніка, на сумеснай калегіі ваенных ведамстваў РФ і Беларусі, якая праходзіць у Менску.

«У гэтых умовах мы вымушаныя прымаць меры ў адказ і павінны быць гатовыя нэйтралізаваць магчымыя ваенныя пагрозы на ўсіх напрамках», – дадаў ён.

«Ваенная актыўнасьць НАТО каля нашых межаў дасягнула небывалага ўзроўню з часоў халоднай вайны. Палітыка альянсу накіраваная на ўзмацненьне сваёй перадавой ваеннай прысутнасьці на ўсходнім флянгу», – заявіў Шайгу. Ён падкрэсьліў, што гэтыя дзеяньні ў НАТО апраўдваюць «міфам» пра пагрозу з боку Расеі.

наша ніва/риа новости/вс