Сьвятлана Алексіевіч стала «Ганаровым грамадзянінам Цэнтральнай Эўропы»

Гэтая ўзнагарода ўручаецца за ўнёсак у разьвіцьцё дэмакратыі і грамадзянскай супольнасьці.

Прэмію сёлета заснаваў Цэнтральнаэўрапейскі форум (CEF) – міжнародная арганізацыя, якая існуе ўжо дзесяць гадоў. Запрашальны ліст на ўручэньне прэміі падпісаў прэзыдэнт Славаччыны Андрэй Кіска. «Вашая прысутнасьць на цырымоніі будзе гонарам для народу маёй краіны», – напісаў ён на адрас беларускай пісьменьніцы.

У кансультатыўную Раду форума ўваходзяць такія вядомыя інтэлектуалы, як Адам Міхнік (Польшча), Міклаш Харасьці (Вугоршчыны), Славенка Дракуліч (Харватыя) ды іншыя эўрапейскія дзеячы культуры й палітыкі.

Цырымонія ўручэньня прэміі прайшла 17 лістапада ў Браціславе на плошчы Славацкага нацыянальнага паўстаньня. Падчас уручэньня, на славацкай мове быў зачытаны ўрывак зь кнігі Святланы Алексіевіч «Час сэканд-хэнд».

euroradio.fm/эж