У Беларусі пачалі выклікаць у суд праз Viber

Паводле інфармацыі службы маніторынгу ГА «Беларуская асацыяцыя журналістаў», позву журналісту-фрылянсэру даслаў на Viber капітан міліцыі, старшы інспэктар па дазвольнай рабоце аддзела аховы правапарадку і прафіляктыкі Сяргей Цырбан.

Падставай для складаньня пратакола стаў сюжэт на спадарожнікавым тэлеканале «Белсат» пра ўшанаваньне памяці ахвяр нацыстаў і камуністаў на Глыбоччыне.

Сёлета гэта ўжо дзясяты пратакол, складзены на журналіста-фрылянсэра Зьмітра Лупача за супрацу з незалежным тэлеканалам «Белсат». Тыдзень таму на Зьмітра Лупача і Тацьцяну Смоткіну пратаколы склала міёрская міліцыя за асьвятленьне імі сацыяльных праблем жыхароў аграгарадка Язна Міёрскага раёна.

Сёлета над Зьмітром Лупачам адбылося 6 судоў, агулам ён ужо заплаціў 4 189,5 беларускіх рублёў штрафу за прафэсійную дзейнасьць.

Паводле БАЖ/ПЦ «Вясна»/юл