Восем тысяч менчукоў прыцягнута ў 2018 годзе да адказнасьці за хатні гвалт

У 2018 годзе 743 менчукі атрымалі ахоўныя прадпісаньні за хатні гвалт, распачата 238 крымінальных спраў прэвэнтыўнай накіраванасьці і амаль 1,5 тысячы чалавек накіравана ў ЛПП, паведамілі карэспандэнту агенцтва «Мінск-Навіны» у ГУУС Менгарвыканкама.

Паводле зьвестак міліцыі, у суткі па Менску рэгіструецца 35-40 правапарушэньняў у сем'ях. Часьцей за ўсё прычынай сямейна-бытавых канфліктаў становіцца злоўжываньне алькаголем і вымушанае сумеснае пражываньне былых мужа і жонкі або іншых сваякоў, з якімі захоўваюцца непрыязныя адносіны.

У 2018 годзе да адміністрацыйнай адказнасьці за хатні гвалт у Менску прыцягнуты 7 871 чалавек, амаль 1,5 тысячы грамадзян накіравана ў ЛПП за зьдзяйсьненьне 4 і больш адміністрацыйных парушэньняў у стане алькагольнага апʼяненьня, 743 дэбашырам выдадзены ахоўныя прадпісаньні, згодна з якімі яны абавязаны пакінуць месца жыхарства на тэрмін ад 3 да 30 сутак з забаронай распараджацца сумеснай маёмасьцю.

Для абароны семʼяў ад хатніх тыранаў выкарыстоўваюцца і крымінальна-прэвэнтыўныя меры – за пагрозы забойствам, катаваньне, зьбіцьцё ў мінулым годзе ўзбуджана 238 прэвэнтыўных крымінальных спраў.

Мінск-Навіны/ав