Кракаўскія актывісты дамагаюцца забароны на вугальнае ацяпленьне

10 тысяч чалавек падпісалі пэтыцыю наконт прыняцьця законаў аб барацьбе са смогам у Малапольскім ваяводзтве на поўдні Польшчы. Подпісы тры тыдні зьбіралі актывісты арганізацыі «Кракаўскі СОС супраць смогу» (Krakowski Alarm Smogowy). Старшыня арганізацыі Анджэй Гула кажа, што пэтыцыя накіраваная ўладам ваяводзтва, якія будуць вырашаць пытаньне аб прыняцьці рэзалюцыі супраць забруджваньня паветра.

Рэзалюцыя прадугледжвае, сярод іншага, забарону на выкарыстаньне вугальных печаў старога тыпу ў новых будынках і дазвол на выкарыстаньне катлоў толькі самага апошняга пакаленьня.

"Правілы неабходныя для абароны здароўя жыхароў", – кажа Войцех Козак, спэцыяліст па ахове чысьціні паветра ў Малапольскім ваяводзтве.

Паводле дасьледаваньня арганізацыі «Кракаўскі СОС супраць смогу» 72 працэнты дамоў у Малапольскім ваяводзтве абаграваюцца вугальнымі катламі, і толькі 18 адсоткаў - катламі на газ.

яс