Тры чацьвёртыя палякаў не жадаюць прымаць уцекачоў з Блізкага Ўсходу
PR dla Zagranicy
Alaksandar Papko
15.04.2017 07:03
Супраць таго, каб Польшча прымала бежанцаў, найчасьцей выступаюць маладыя й найбольш рэлігійныя людзі.
pixabay.com/Public Domain/CC0
74% палякаў выступаюць супраць таго, каб Польшча прымала бежанцаў з краінаў Блізкага Ўсходу й Афрыкі. 22% падтрымліваюць ідэю прымаць бежанцаў, а 5% ня маюць меркаваньня на гэты конт. Такія дадзеныя апублікавала польскае дзяржаўнае сацыялягічнае агенцтва CBOS.
Часьцей за прыняцьцё ўцекачоў з Блізкага Ўсходу выступаюць жыхары вялікіх гарадоў, людзі з вышэйшай адукацыяй і высокімі заробкамі. Супраць таго, каб Польшча прымала бежанцаў, выступаюць, як правіла, самыя маладыя ўдзельнікі апытаньня (ва ўзросьце 18-24 гадоў), а таксама людзі, якія рэгулярна ходзяць у царкву (раз на тыдзень альбо часьцей).
Больш сымпатыі палякі выказваюць да мігрантаў і магчымых уцекачоў з ахопленых канфліктам рэгіёнаў Украіны. Да ідэі даць прытулак уцекачам з Данбасу прыхільна ставяцца 55% рэспандэнтаў. Супраць – 40%.
PAP/ап