Два польскія паліцыянты папаліся на кантрабандзе цыгарэтаў зь Беларусі

Двух польскіх паліцыянтаў з Саколкі падазраюць у кантрабандзе цыгарэтаў. Здарэньне адбылося 11 траўня.Абодвух злавілі пры перасячэньні беларуска-польскай мяжы – у Кузьніцы, на польскім баку.

Калегі з дарожнай паліцыі ехалі зь Беларусі ў Польшчу двума аўтамабілямі. Адзін вёз 662 пачкі цыгарэтаў розных марак, другі – 760 пачкаў.

Пракуратура ўжо выставіла ім абвінавачаньні ў кантрабандзе тытуню бяз польскіх акцызных марак. За гэта ім пагражае штраф і/або зьняволеньне.

Паводле словаў пракурора Артура Кубэрскага, падазраваныя прызналі сваю віну. Кіраўніцтва паліцыі Падляскага ваяводзтва ўжо звольніла абодвух паліцыянтаў.

эўрарадыё/poranny.pl/вс