Польская чыгунка ўвяла адзін квіток на ўікэнд

Польская чыгунка ўвяла квіток на выходныя дні. Гэты білет дае магчымасьць езьдзіць без абмежаваньняў на хуткасных цягніках кампаніі PKP Intercity, якая абслугоўвае міжгарадзкія маршруты, i кампаніі Polregio, якая абслугоўвае рэгіянальныя спалучэньні. Квіток дзейнічае з пятніцы ад 7-ай гадзіны вечара да 6-ай раніцы ў панядзелак.

З фінансавага пункту гледжаньня - гэта вельмі карысная прапанова для пасажыраў.

«Квіток прадаецца ў двух відах», - кажа прадстаўнік PKP Intercity Анна Закшэўска (Anna Zakrzewska).

А.Закшэўска: Квіток „Razem w Polskę standard” за 109 злотых ($30) дзейнічае на цягніках 2 клясу TLK ды Intercity IC і на цягніках Polregio. А квіток „Razem w Polskę komfort” за 189 злотых ($52) дае магчымасьць падарожнічаць па краіне ў вагонах 2 клясу ўсіх цягнікоў PKP Intercity i Polregio.

Чыгуначны квіток на выходныя можна купіць за 30 дзён да заплянаванай паездкі ў касах на вакзалах і ў кандуктара ў цягніках (акрамя складоў EIP).

У верасьні плянуецца ўвесьці сумесны квіток PKP Intercity, Polregio і хуткай гарадзкой чыгункі SKM Гданьск-Гдыня-Сопат.

яс